Афганистанда электр энергиясынын тартыштыгы бул өлкөнүн эли үчүн олуттуу көйгөйлөрдү жаратты. Өлкөнүн ички электр өндүрүү мүмкүнчүлүгү жетишсиз болгону менен, бар болгон инфраструктура чектелүү жана эскирген. Мындан улам Афганистан кошуна мамлекеттерден келген импорттук электрге көз каранды бойдон калууда.

Мазари-Шариф, Кабул жана Герат сыяктуу ири шаарлар да негизинен сырттан келген электр энергиясы менен камсыздалат. Кошуна өлкөлөрдөн электр энергиясын берүү токтоп калган же өткөрүүчү чубалгылар бузулуп калган учурлар бул шаарларда электр энергиясы тез-тез үзгүлтүккө учурашына себеп болууда.

Энергиянын жетишсиздиги күнүмдүк жашоого да, ишкердикке да чоң тоскоолдук болууда. Борбор шаардын тургундары күн сайын бир нече сааттык өчүрүүлөргө туш болушат. Азыркы тапта Кабул шаарында суткасына болгону 2–5 саат гана жарык берилүүдө.

Мындан тышкары, акыркы жыйырма жылда Афганистан миллиарддаган доллар жардам алганы менен электр инфраструктурасы олуттуу деңгээлде жаңыланбай, өлкө дагы эле кошуналарга көз каранды бойдон кала берүүдө.

Акыркы бир жылдын ичинде мамлекеттик жана жеке сектор ГЭС, жылуулук жана күн энергиясын өндүрүүгө инвестиция салышты. Бирок бул долбоорлор узак убакыт талап кылат же өндүрүү кубаттуулугу аз.

Жакында Афганистан өкмөтү чет элдик инвесторлор менен 20 миң мегаватт электр энергиясын өндүрүүгө багытталган келишимдерге кол койду. Графикке ылайык, жакынкы эки жылдын ичинде кеминде 2000 мегаватт өндүрүү пландалууда.

Учурдагы абалды эске алганда, афган элине чыдамкайлык менен күтүп, келечектен жакшы үмүт кылуудан башка арга калбай тургандай көрүнөт.

Афганистан электр энергиясынын олуттуу бөлүгүн импорттойт. Бул импорт Өзбекстан, Тажикстан, Түркмөнстан жана Иран сыяктуу коңшу өлкөлөрдөн келет. Импорт өлкөнүн жалпы керектөөсүнүн болжол менен 75–80% түзөт. Өлкө болжол менен 720-800 МВт электр энергиясын импорттосо, өзүнүн өндүрүшү болжол менен 250-600 МВт түзөт.

Булак: eurasiatoday