Эл акыны Майрамкан Абылкасымова бүгүн, 18-октябрда, акыркы сапарга узатылды. Аны менен коштошуу зыйнаты Бишкектеги Опера жана балет театрында уюштурулган.

Бүткүл союздук Ленин комсомолу сыйлыгынын лауреаты, белгилүү акын жана Кыргызстандын жазуучулар союзунун мүчөсү М.Абылкасымова 16-октябрда 85 жаш курагында көз жумган.

Бүгүнкү иш-чарага маданият министри Азамат Жаманкулов, мамлекеттик катчы Сүйүнбек Касмамбетов, Кыргызстандын улуттук жазуучулар союзунун төрагасы Нурлан Калыбеков, «Курманжан-датка» коомдук фондунун төрайымы Жылдызкан Жолдошева, КТРКнын баш директорунун милдетин аткаруучу Кайрат Иманалиев, маданият өкүлдөрү, маркумдун жакындары жана үй-бүлөсү катышты.

Акыркы сапарга узатуу зыйнаты Улуттук гвардиянын жоокерлеринин катышуусунда өтүп, маркум «Ала-Арча» көрүстөнүнө коюлду.

Булак: NazarNews.kg