Аалымдар кеңешинин Каттоо жана аттестациялоо комиссиясынын төрагасы Абдиманап Масалиев кеңештин мүчөлүгүнө талапкерлерди тандоо мамлекеттик кызматкерлердин кийлигишүүсүнөн улам өтпөй калганын билдирди.

Ал түзүлгөн жагдайдан улам президент Садыр Жапаровго ачык кайрылуу жолдогон.

«25-май күнкү Аалымдар кеңешинин VII чакырылышынын мүчөлүгүнө талапкерлерди тандоо конкурсубуз айрым мамлекеттик кызматтын өкүлдөрүнүн түздөн-түз кийлигишүүсү менен өтпөй калды. Талапкерлер жети дубандан келишкен эле.

Сынактар токтотулгандыктан айрым талапкерлер ушуну менен экинчи ирет убара болушту. Аалымдар кеңешинин мүчөлүгүнө талапкер болгон 47 кишинин колу коюлган кайрылуусун жана өтүнүчтөрүн мамлекеттик мекеменин кызматкерлерине көрсөткөнүбүзгө карабастан конкурс белгисиз мөөнөткө жылдырылды.

Мындай абалда Кыргызстан мусулмандарынын 29-майдагы кезектеги Курултайын да өткөрө албай калуу ыктымалдыгы пайда болду. Мамлекеттик мекеменин өкүлдөрү эпидкырдаалды жүйө келтиришүүдө», — деп жазылган кайрылууда.

Ошондой эле, ал учурда муфтияттын жетекчилик курамы жана финансылык жагы кризистик абалда турганын белгилеген. КМДБнын 208 кызматкери төрт айдан бери айлыксыз иштеп жатканы айтылды.

Эске салсак, Аалымдар кеңешинин мүчөлөрүн тандап, андан соң курултайдын негизинде муфтийди шайлоо күнү 5-апрелге белгиленген. Бирок андан да айрым адамдардын диний кастыкты жана регионалдык чагымчылдыкты козутуу максатында кысым жасоосу, комиссия төрагасын телефон аркылуу опузалоосу комиссиянын толук кандуу иш алып баруусуна жолтоо болгону айтылып, 29-майга жылдырылган.

Бүгүнкү күндө муфтийдин милдетин Жоробай ажы Шергазыев аткарып жатат.

Булак: NazarNews.kg