Кечээ, 12-июнда Бишкек — Чалдыбар жолунда жүргүнчү ташыган маршруттук каттам бакты сүзүп, анын кесепетинен эки киши каза тапкан. Бул тууралуу Чүй облустук Жол кыймылы коопсуздугун камсыздоо башкармалыгынын маалымат кызматы билдирди.

Жол кырсыгы кечки саат 18:00 чамаларында болгон. 

"Mercedes-Benz Sprinter үлгүсүндөгү унаа Бишкектен Чалдыбар айылына бара жаткан. Жолдун 82-чакырымында айдоочу рулду башкара албай бакты сүзгөн. Кырсыктан төрт адам, анын ичинде айдоочу жабыркап, дагы эки жүргүнчү каза болду. Бирөө кырсык болгон жерден мүрт кетсе, экинчиси ооруканада көз жумду", — деп айтылат билдирүүдө. Азыркы учурда тиешелүү экспертизалар дайындалып, материалдар Панфилов районунун ички иштер бөлүмүнө өткөрүлүп берилгени кабарланды.

Булак: NazarNews.kg