Далы менен кыргызча төлгө тарткан, белгилүү төлгөчү, коомдук ишмер, Раим Матраимовду колдоо митингдеринин Башкы дирижеру Кайып Шер менен маек.

- Сенин тарткан төлгөлөрүң дайыма дал келчү эле, Матраимов тууралуу төлгө тарта алдыңбы?

- Төлгө боюнча «Ак ийилет, бирок сынбайт», Батышчылдардын баканооздугу менен камалып жаткан Райымбек Матраимов бошотулуп, эл үчүн кызматын өтөй баштайт экен. Мына жакында 11-апрелде Конституцияга референдум болуп, батышчылдардын тиреги болгон парламенттик башкаруудан президенттик башкарууга өттүк. Парламенттик башкаруу учурунда ким оозуна алы келип сүйлөсө, ошонун сөзү эп боло турган. Ошондуктан, ар кимдин көкүтүүсү менен  Райымбек Матраимов камалып жатат, ал эми  урматтуу президентибиз  Садыр Жапаров: «Камакты жалган жалаалар менен камалгандар менен толтуруп кереги жок. Андан көрө мамлекеттик бюджетке төкчүлөрүн төгүп айыптарын актасын» деп жатат. Райымбек Матраимов президентибиздин айткандарын так аткарды. Учурда УКМКнын башчысы Камчыбек Ташиев адилеттүүлүк үчүн катуу күрөшүп жатат. Камчыбек Кыдыршаевич Райымбек Матраимовдун тартипти бекем сактап акчаларын төккөнү тууралуу маалымдаган. Жаңы кабыл алынган Конституция менин тарткан төлгө менен дал келип жатат. Райымбек Матраимовдун камактан бошотулуп, эл үчүн кызмат кыла турган учуру келди. Ал эл үчүн иштеп ал эмес урматтуу президентибиз Садыр Жапаров тарабынан жогорку сыйлыкка татыктуу болот.

- Ким бийликке келсе чөгөлөп, жүгүнүп бергендер бар. Сен убагында Атамбаевдик бийлик жалаа жаап каматкан көптөгөн «Абийир туткундарын» колдоп жүрүп, Атамбаевге жек көрүндүң. Райымбек Матраимов камалганда да колдоп, митингдердин башында сенин коңур добушуң жаңырып турду. Райымбек Матраимовду колдоп жатканыңдын себеби эмнеде?

- Азыркы бийлик башындагы Камчыбек Ташиев, Садыр Жапаров,Талант Мамытовдорду, кыргыздын эң жүрөктүү жигиттери, келечек үчүн күрөшүшкөн Ахматбек Келдибеков, Бекболот Талгарбеков, Нурлан Мотуев, Бектур Асанов, Кубанычбек Кадыров сыяктуу көптөгөн адамдарды Атамбаевдик бийлик камаганда, колдогонубуз чындык. Калем сабыңды көтөрүп алып, сен деле жүрчүсүң. Бүгүн урматтуу Садыр Нургожоевичтин заманында коопсуздук органдардын «чыт курсактардын» айгагына кирип Райымбек Матраимовду камаганы туура эмес. Муну адилеттүүлүк үчүн камалып, көптү көргөн Садыр Жапаров жасаган жок. Таразалап көрүш керек. Матраимов Шадиевке окшоп жер түбүнө кире качкан жок. Качса качып деле кетмек. Коронавирус күчөп турган маалда Матраимов «Исмаил-Ата» фондунун негизинде Кыргызстандын бардык аймагына гуманитардык жардамдарды бергени жалганбы? Матраимовдон бай Шадиевди алалы, кимге бир тыйын жардам берди, өз көлөкөсүнөн өзү качып, жашынып жатат. Батышчылдардын оюу боюнча Кыргызстанда  эң бай адам катары Райымбек Матраимов эсептелип жатат. Кыргызстанда андан бай адамдар толтура, бирок элдин башына күн түшүп жаткан учурда алар эмне жардам берди?

- 2020-жылдын 20-октябрында Башкы прокуратура менен Райымбек Матраимовдун ортосунда кызматташуу боюнча келишим түзүлгөн, бул Биринчи май райондук соту тарабынан бекитилген. Кылмыш процессуалдык кодексинин 496 беренесинин негизинде кызматташтык боюнча түзүлгөн келишимдин шарттарын айыпталуучу толугу менен аткарган соң, айыпкерге жаза берүү үчүн өкүм чыгарылат, бул жерде кызматташкандык эске алынат. Кызматташуунун негизинде Райымбек Матраимов тарабынан 2 000 009 635 сом, 12 000 000 жана 8 000 000 сом төлөнүп берилген. Кызматташуу тууралуу келишимде түзүлгөн шарттар боюнча Матраимов тарабынан бардык шарттар сакталды, анда эмнеге аны камап жатышат?

- Элдин азыркы күндөгү абалын көрүп, мамлекеттик бюджетке пайда түшүрүш үчүн Башкы прокуратура менен мыйзамдын негизинде келишим түзүп, 2 миллиард сомду бюджетке төлөп берди. Ошол үчүн Райымбек Матраимовду үлгү тутуп президент Садыр Жапаров өзүнө кеңешчи кылып алыш керек. Азыр Кыргызстанда Орусия, Кытай, арабдар жана Батыштын инвестициялары чоң күч болуп турат. Райымбек Матраимовдун Орусия, Кытайда таасири бар, арабдар менен да жакшы мамиле күтүп, инвестициясын тартууга мүмкүнчүлүгү бар. Батыш, айрыкча АКШ өзүнүн «кол алдындагы» «Азаттык» үн алгысынын бузуку сөзүн угуп, Райымбек Матраимовго көңүл бурбай жаткандай. Эгер батышчылдар жамандабаса АКШ менен деле жакшы тил таап кетмек. «Азаттык» тараптан каралоону, он миллиардаган долларды ашап коюп, жамандыкты өзүнөн оолактаткысы келип турган Атамбаев жасап жаткандай. Ал Путинди жалмап бүткөн, эми АКШнын акча ресурстарын пайдаланып алгысы келип, мурун Акаев, Бакиевди «бөө» деп келсе, эми элдин көңүлүн буруш үчүн Райымбек Матраимовго асылып жатат? «Чыт курсактарды» акчага сатып алып, тукуруп жатат.

- Кылмыш-Жаза кодексинин 319 беренесинде жаза дайындоо мыйзам чегинде болот деп жазылган. Кылмыш процессуалдык кодексинин 496 беренесинин 2 пунктунда кызматташтык боюнча түзүлгөн келишимдин шарттарын айыпталуучу толугу менен аткарганын мамлекеттик айыптоочулар тастыктайт деп турат. Мыйзамдуу тастыкталган соң кызматташтык боюнча түзүлгөн келишимдин шарттарынын негизинде камалбай эле 5 категорияда айып төлөш керек эле.

- Мыйзамды эмес «Чыт курсактардын» кыйкырыгын уккандар ушуга барып жатат. Алардын дооматы жалган. Азыр бизге стабилдүүлүк керек, жаңы бийликти колдон-буттан алып мамлекетибизди өнүктүрүүбүз зарыл. Мына канчалаган адамдар Райымбек Матраимовду колдоп, ага боштондук тилеп чыгып жатат. Эгер ушундай жолго түшсөк күзүндө айтылган «экономикалык амнистия» тууралуу айтылган сөздөр жалгандыкка чыгып калабы? Мыйзам боюнча да Матраимов туура иштерди жасаган, ал эми Садыр Нургожоевичтин түрмөнү толтуруп кереги не, андан көрө акчаларды төлөп бергени жакшы эмеспи деп айтканы эң туура. Эгер бюджетке акча төлөгөндөрдү камап жатса, эртең акча ким төлөйт?

- Али Токтакунов балга конгон аарыдай болуп бир гана Матраимовго жабышып алды. Анын өз оюу барбы же артынан шыкактаган шыкакчылары барбы?

- Ал иштеген «Азаттык» үн алгысы Американын Конгресси тарабынан каржыланат. Андан тышкары Фарид Ниязов аркылуу Атамбаев Венера Сагындык кызы менен байланышта. Президент кезде баалуу квартира баш болгон, көптөгөн белектерди бергени айтылат. Венера Сагындык кызына иш керек, Атамбаев каршы чыккан Раим Матраимовду АКШ алдында «сындырып» берүү анын милдети. Али Токтакунов жөн эле фигура.

-Али Токтакунов менен Улан Эгизбаев тууралуу эл арасында аралап жүргөн сөздүн чындык төгүнү барбы?

-«Тегин жерден сөз чыкмак беле»? Эл бекер жерден айтпайт. Али Токтакуновдун амбициясы чоң, коррупцияга каршы белсенип киришкен Улан Эгизбаев бар болсо, Али Токтакунов талаада текей терип жүрмөк.Улан Эгизбаев көлдө балыктай сүзчү, кимдир-бирөөлөр көл алдында скафандр кийип алып, анын чөгүшүнө жардам бербесе, ал чөкмөк эмес. Көрбөгөн соң кармай албайт экенбиз, Али Токтакунов ушундай ишке барган деген да версия бар.

- Орусиянын жарандары кирип жүргөн «Магнитскийдин тизмесине» эмнеге Райымбек Матраимовду чаптап коюшту?

- Бул да батышчылдардын баканооздугунун айынан. Эми Конституция өзгөрүлүп туура жолго түшкөнү туурабыз. Буюрса, Райымбек Матраимов бошотулуп эл үчүн кызмат кыла турган убак чукулдап калды.

Маектешкен: Азизбек КЕЛДИБЕКОВ, NazarNews.kg