Павел Хрипунов президент Садыр Жапаровдун кеңешчиси болуп дайындалды. Белгилүү болгондой, тиешелүү жарлыкка 28-октябрда кол коюлган.

Хрипунов президенттин алдындагы санариптештирүү маселелери боюнча байкоочу кеңештин мүчөсү. Буга чейин президенттин коомдук башталыштагы кеңешчиси болчу.

Хрипунов Павел Владимирович мурдагы россиялык чиновник. Интернеттеги маалыматка таянсак, 1977-жылы 13-октябрда Кыргыз ССРнын Ош облусунун Айдаркен айылында туулган. 2001-жылы Москва мамлекеттик курулуш университетин өнөр жай жана жарандык укук адистиги боюнча аяктаган.

Маалымат технологиялары тармагында 1997-жылдан бери иштейт. 2000-жылдары «Бирдиктүү энергетика системасынын Федералдык тармактык компаниясында» документ алмашуу электрондук системасын ишке киргизүү жана жайылтуу менен алектенген.

2010-2014-жылдары «Инвест Информ Проект» компаниясын жетектеген. Кийинчерээк бул компаниянын аталышы «Интер РАО ИТ» болуп өзгөргөн жана «Интер РАО» энергетикалык холдингин маалыматташтыруу менен алектенген.

2017-жылы Орусиянын пенсиялык фондунун Автоматташтырылган маалымат системасынын инфраструктурасын башкаруу департаментинин жетекчиси болуп дайындалган. Орусиянын пенсиялык фондунан 2018-жылы кеткен.

2019-жылы Орусиянын Санариптик өнүктүрүү, байланыш жана массалык коммуникация министрлигине караштуу Маалыматташтырууну координациялоо жана экспертиза борборунун директорунун кеңешчиси болуп иштеген.

Булак: NazarNews.kg