Өзбекстандын Сырдарыя облусунда суу сактагычта дамба жарылып айылды суу каптаган. Учурда жашоочулар эвакуацияланды. Бул тууралуу өлкөнүн Өзгөчө кырдаалдар министрлиги кызматына таянып, өзбек басылмалары жазып чыгышты.

Кабарларга ылайык, 1-майдын таңында Сардобинск суу сактагычындагы дамбалардын бири жырылып кетип, кесепетинен Кургантепа айылын суу каптаган.

“Куткаруучулар Кургантепанын калкын убактылуу коопсуз аймакка көчүрүштү. Жабыркагандар жана каза болгондор жок“,- деп айтылат ӨКМдин маалыматында.

Учурда суу каптоо коркунучу бар коңшу райондун айылдарында тургундарды көчүрүү иштери уланууда.

Сардобинск суу сактагычы 2017-жылы курулган, ага 922 миллион куб метр суу сакталып келген.

Булак: NazarNews.kg